இருள் சூழ்ந்த உலகினில் அநீதி தாண்டவமாட,
இதயங்கள் பாரத்தால் மௌனமாய் அழக்கூடும்!
தீயவர் செருக்கும், ஊழலின் கரங்களும்
நீதியை மறைக்கச் சூழ்ச்சிகள் செய்யக்கூடும்!
ஆனால்...
கைவிடாத கரம் ஒன்றுண்டு!
ஆண்டவர் தம் மக்களை ஒருபோதும் தள்ளிவிடார்,
உரிமைச் சொத்தாம் உங்களை என்றும் கைவிடார்!
மனிதர் உங்களை 'வேண்டாம்' என ஒதுக்கினாலும்,
மன்னவன் மார்பில் உங்களுக்கு இடமுண்டு!
மீண்டும் மலரும் நீதி!
தீர்ப்பு வழங்கும் முறையில் தர்மம் தலைதூக்கும்,
திரும்பவும் நீதியின் செங்கோல் ஓங்கும்!
நேரிய மனத்தினர் நேர்வழி நடப்பார்,
நிச்சயம் அவர்கள் வாழ்வு செழிக்கும்!
மரண மௌனம் கலைக்கும் உதவி!
"கர்த்தர் எனக்குத் துணையாய் இராவிடில்,
கல்லறை மௌனம் என்னைத் தழுவியிருக்கும்!"
என்ற சங்கீத வரிகள் சத்தியம் அன்றோ?
அவர் உதவி செய்ய ஓடி வருவார்!
தேற்றும் திருவருள்!
முயற்சிகள் தோற்று, இயலாமை சூழ்ந்தாலும்,
காலம் கனியும்போது கர்த்தர் கிரியை செய்வார்!
அமைதியாய் வந்து நம் ஆன்மா மீட்பார்,
அநீதி அழித்து இறைநீதி நிலைநாட்டிடுவார்!
ஏப்ரல் 2026
0 Comments