1947 இந்தியா விடுதலை அடைந்தாலும், இந்தியாவில் 1976 ஆம் ஆண்டுக்கு முன்பு வெளிநாட்டுப் பணம் தடையின்றி வந்தது. வெளிநாட்டுப் பணம் இந்தியாவிற்குள் வருவதை ஒழுங்குபடுத்த (FERA - Foreign Exchange Regulation Act, 1947) என்ற சட்டம் மட்டுமே இருந்தது. ஆனால், இது பொருளாதார ரீதியான பரிமாற்றங்களை (வணிகம் மற்றும் வர்த்தகம்) கண்காணிக்கவே பயன்படுத்தப்பட்டது. தொண்டு நிறுவனங்கள் பெறும் "நன்கொடை" அல்லது "பங்களிப்பு" ஆகியவற்றை இது தீவிரமாகக் கண்காணிக்கவில்லை. இந்தச் சூழலில், வெளிநாட்டு பங்களிப்பு ஒழுங்குமுறை குறித்த சட்டம் (Foreign Contribution Regulation Act) ஒரு முக்கிய தேவையாக இருந்தது.
1. வெளிநாட்டு பங்களிப்பு ஒழுங்குமுறை சட்டம் (FCRA, 1976)
FCRA 1976 என்பது இந்தியாவில் வெளிநாட்டு நிதி வரவுகளைக் கண்காணிக்கவும் ஒழுங்குபடுத்தவும் 1976 இல் (காங்கிரஸ் ஆட்சிக் காலத்தில்) கொண்டுவரப்பட்ட ஒரு முக்கியமான சட்டமாகும். 1975-இல் இந்திரா காந்தி அவர்களால் அறிவிக்கப்பட்ட அவசரநிலையின் போது, நாட்டின் பாதுகாப்பைக் கருத்தில் கொண்டு வெளிநாட்டு நிதியைக் கட்டுப்படுத்த வேண்டியது அவசியம் என்று அரசு முடிவு செய்தது. FCRA சட்டம் அனைத்து மத மற்றும் சமூகத் தொண்டு நிறுவனங்களுக்கும் பொதுவானது. வெளிநாட்டு நிதி இந்தியாவிற்குள் வரும்போது, அது எந்த நோக்கத்திற்காகப் பெறப்பட்டதோ, அதே நோக்கத்திற்காகப் பயன்படுத்தப்படுவதை உறுதி செய்யவே இந்த விதிகள் வகுக்கப்பட்டுள்ளன. இந்தியாவில் உள்ள தனிநபர்கள், சங்கங்கள் அல்லது நிறுவனங்கள் வெளிநாட்டிலிருந்து பெறும் நிதி, நாட்டின் பாதுகாப்பு மற்றும் இறையாண்மைக்கு எதிராகப் பயன்படுத்தப்படுவதைத் தடுப்பதே இச்சட்டத்தின் முதன்மை நோக்கம். குறிப்பாக, அரசியல் கட்சிகள் அல்லது பொது ஊழியர்கள் வெளிநாட்டுப் பணத்தின் மூலம் செல்வாக்கு செலுத்தப்படுவதைத் தவிர்க்க இது உருவாக்கப்பட்டது.
எந்தவொரு அரசு சாரா நிறுவனமும் (NGO) வெளிநாட்டு நிதியைப் பெற விரும்பினால், அவர்கள் மத்திய உள்துறை அமைச்சகத்தில் FCRA-ன் கீழ் பதிவு செய்திருக்க வேண்டும். பெறப்படும் நிதி எந்த நோக்கத்திற்காகப் பெறப்பட்டதோ (உதாரணமாக: கல்வி, மருத்துவம்), அதற்காக மட்டுமே பயன்படுத்தப்பட வேண்டும். வெளிநாட்டு நிதியைப் பெற்ற நிறுவனங்கள் தங்களின் கணக்கு வழக்குகளைத் துல்லியமாகப் பராமரிக்க வேண்டும் மற்றும் ஆண்டுதோறும் அரசுக்கு அறிக்கை தாக்கல் செய்ய வேண்டும்.
2. வெளிநாட்டு பங்களிப்பு ஒழுங்குமுறை சட்டம் 2010, (FCRA 2010)
காலப்போக்கில் ஏற்பட்ட மாற்றங்களைக் கருத்தில் கொண்டு, FCRA 2010 என்ற புதிய சட்டம் காங்கிரஸ் ஆட்சியில் கொண்டுவரப்பட்டது. இந்தியாவில் உள்ள தன்னார்வத் தொண்டு நிறுவனங்கள் (NGOs), சங்கங்கள் மற்றும் தனிநபர்கள் வெளிநாட்டிலிருந்து பெறும் நிதியை முறைப்படுத்துவது இதன் நோக்கம். குறிப்பாக, இந்த நிதி மதமாற்றம், தேசவிரோதச் செயல்பாடுகள் அல்லது தேர்தல் முறைகேடுகளுக்குப் பயன்படுத்தப்படுவதைத் தடுப்பதே இதன் இலக்கு.
சமூக, கல்வி, மத, கலாச்சார அல்லது பொருளாதார நோக்கங்களுக்காகச் செயல்படும் அமைப்புகள் வெளிநாட்டு நிதியைப் பெறலாம். ஆனால், அதற்கு முன் மத்திய உள்துறை அமைச்சகத்தில் (MHA) பதிவு (Registration) செய்திருக்க வேண்டும். அல்லது குறிப்பிட்ட ஒரு திட்டத்திற்காக நிதி பெற முன் அனுமதி (Prior Permission) பெற்றிருக்க வேண்டும். அரசியல் கட்சிகள், வேட்பாளர்கள், நீதிபதிகள் மற்றும் அரசு ஊழியர்கள் வெளிநாட்டு நிதியைப் பெறத் தடை விதிக்கப்பட்டுள்ளது. 2010 சட்டப்படி, பெறப்படும் வெளிநாட்டு நிதியில் 50% வரை நிர்வாகச் செலவுகளுக்குப் பயன்படுத்தலாம்.
FCRA பதிவு பெற்ற ஒரு அமைப்பு, தான் பெற்ற வெளிநாட்டு நிதியை மற்றொரு அமைப்புக்கு (அவர்கள் பதிவு பெற்றிருந்தாலும் கூட) மாற்ற அனுமதி இல்லை. FCRA பதிவு என்பது 5 ஆண்டுகள் மட்டுமே செல்லுபடியாகும். பதிவு காலம் முடிவதற்கு 6 மாதங்களுக்கு முன்பே புதுப்பித்தலுக்கு விண்ணப்பிக்க வேண்டும். அரசு அந்த அமைப்பின் செயல்பாடுகளை ஆய்வு செய்த பின்னரே புதுப்பிக்கும். வெளிநாட்டு நிதியைப் பெறுவதற்கு எனத் தனியான ஒரு வங்கிக் கணக்கை வைத்திருக்க வேண்டும். அந்த நிதியை உள்நாட்டு நிதியுடன் (Domestic funds) கலக்கக் கூடாது.
3. வெளிநாட்டு பங்களிப்பு ஒழுங்குமுறை சட்டம் 2020, (FCRA, 2020)
பின்னர் 2020-ஆம் ஆண்டில் இதில் மீண்டும் சில கடுமையான திருத்தங்கள் செய்யப்பட்டன. 2020 திருத்தத்திற்கு முன்பு, FCRA பதிவு பெற்ற ஒரு நிறுவனம் வெளிநாட்டிலிருந்து நிதியைப் பெற்று, அதை மற்ற சிறிய NGO-க்களுக்குப் பகிர்ந்து வழங்க முடியும். ஆனால், இப்போது அது முற்றிலும் தடை செய்யப்பட்டுள்ளது. நிர்வாக செலவின் பயன்பாடு 20% ஆகக் குறைக்கப்பட்டுள்ளது. அதாவது நிதியின் பெரும் பகுதி நேரடியாகப் பொதுநலத் திட்டங்களுக்கே செல்ல வேண்டும்.
2020-ல் செய்யப்பட்ட திருத்தத்தின்படி, இப்போது அனைத்து வெளிநாட்டு நிதிகளும் டெல்லியில் உள்ள State Bank of India (SBI), Main Branch-ல் உள்ள "FCRA Account"-க்கு மட்டுமே வர வேண்டும். FCRA பதிவு அல்லது புதுப்பித்தலுக்கு விண்ணப்பிக்கும் அமைப்பின் நிர்வாகிகள், இயக்குநர்கள் அல்லது முக்கியப் பொறுப்பில் உள்ள அனைவரும் தங்களது ஆதார் எண்ணை (Aadhaar Number) அடையாளச் சான்றாக அளிப்பது கட்டாயமாக்கப்பட்டுள்ளது. வெளிநாட்டினராக இருந்தால் பாஸ்போர்ட் நகல் அளிக்க வேண்டும்.
4. FCRA 2026 மசோதா
FCRA 2026 திருத்த மசோதா (Foreign Contribution Amendment Bill, 2026) என்பது மார்ச் 25, 2026 அன்று மக்களவையில் அறிமுகப்படுத்தப்பட்டது. இது இன்னும் சட்டமாக்கப்படவில்லை. ஒரு குறிப்பிட்ட திட்டத்திற்காக பெறப்படும் நிதி (Prior Permission), அரசால் நிர்ணயிக்கப்படும் காலத்திற்குள் (உதாரணமாக 4 ஆண்டுகள்) பயன்படுத்தி முடிக்கப்பட வேண்டும். காலக்கெடு முடிந்தவுடன் அந்த அனுமதி தானாகவே ரத்து செய்யப்படும் (Automatic Cessation). அமைப்பின் நிர்வாகிகள் யார் என்பதில் தெளிவான விளக்கம் அளிக்கப்பட்டுள்ளது. இனி ஒரு அமைப்பின் இயக்குநர்கள், அறங்காவலர்கள் (Trustees), கூட்டாளிகள் (Partners) மற்றும் இந்து கூட்டு குடும்பத் தலைவர்கள் (Karta) என அனைவரும் "Key Functionary" என்ற வரையறைக்குள் வருவார்கள். ஏதேனும் முறைகேடு நடந்தால் இவர்கள் அனைவரும் தனிப்பட்ட முறையில் பொறுப்பாவார்கள்.
ஒரு அமைப்பின் FCRA உரிமம் ரத்து செய்யப்பட்டால் அல்லது அவர்களே உரிமத்தை ஒப்படைத்தால், வெளிநாட்டு நிதியைப் பயன்படுத்தி அவர்கள் வாங்கிய சொத்துக்கள் (நிலம், கட்டிடம், பள்ளிகள், மருத்துவமனைகள்) அரசிடம் ஒப்படைக்கப்படும். இதற்காக "Designated Authority" (நியமிக்கப்பட்ட அதிகாரி) என்ற புதிய பதவி உருவாக்கப்படும். இந்த அதிகாரி அந்தச் சொத்துக்களை நிர்வகிப்பார் அல்லது விற்க அதிகாரம் கொண்டிருப்பார்.
ஒரு சிறிய ஆறுதலாக, FCRA விதிகளை மீறுவோருக்கான அதிகபட்ச சிறைத்தண்டனை 5 ஆண்டுகளில் இருந்து 1 ஆண்டாகக் குறைக்க இந்த மசோதா பரிந்துரைக்கிறது. இது சிவில் குற்றங்களை கிரிமினல் குற்றங்களாகக் கருதுவதைக் குறைக்க எடுக்கப்பட்ட நடவடிக்கையாகப் பார்க்கப்படுகிறது.
இது தான் கிறிஸ்தவர்கள் / மற்ற NGOs பயப்படும் காரியம். ஆனால் சரியாக License புதுப்பித்தல் இருந்தாலும், விதிமுறை மீறல்கள் இல்லாவிட்டாலும், பெற்ற நிதியை சரியாக பயன்படுத்தினாலும், பயப்பட வேண்டிய அவசியமில்லை. சட்டத்தின் விதிமுறைகளைச் சரியாகப் பின்பற்றும் எந்தவொரு அமைப்புக்கும் (கிறிஸ்தவ அமைப்புகள் உட்பட) இந்தச் சட்டத்தால் பாதிப்பு ஏற்படுவதில்லை. இது ஒரு குறிப்பிட்ட மதத்திற்கு எதிரானது என்பதை விட, நிதிப் பரிமாற்றத்தில் வெளிப்படைத்தன்மையைக் கொண்டு வருவதையே நோக்கமாகக் கொண்டுள்ளது.
இந்த மசோதா சட்டம் ஆகுமா என்று பொறுத்து இருந்து பார்ப்போம்.
0 Comments