அச்சிடப்பட்ட விவிலியமா? மின்னணு சாதனமா? – ஓர் ஆன்மீகப் பார்வை Printed Bible or Digital Device? – A Spiritual Perspective

அலைபேசி & டப் வைத்து பிரசங்கிப்பது தவறா?

அச்சிடப்பட்ட வேதாகமத்தைக் கையில் ஏந்திப் பிரசங்கிப்பது மதிப்பிற்குரியது என்பதில் சந்தேகமில்லை. அதே வேளையில், தேவ வார்த்தையைப் பகிர்ந்துகொள்ள அலைபேசி அல்லது டேப் பயன்படுத்துவது ஆன்மீக ரீதியாகவோ, வேதாகம ரீதியாகவோ தவறோ அல்லது பாவமோ அல்ல. ஆனால், ஜெபத்துடன் ஆயத்தப்பட வேண்டும். கூகுள் & ஆன்லைன் குறிப்புகள் வைத்து பிரசங்கிப்பது கூடாது. கடவுள் பிரசங்கிக்கிறவனின் இருதயத்தையும், அவன் அறிவிக்கும் சத்தியத்தின் உண்மையையும்தான் பார்க்கிறார்.

1. கருவியைக் காட்டிலும் கர்த்தரின் வார்த்தையே முதன்மையானது

அச்சிடப்பட்ட வேதப் புத்தகத்தைக் கையில் ஏந்தி வாசிப்பதும், பிள்ளைகளுக்கு அதைச் சுமந்து செல்லவும் மதிக்கவும் கற்றுக்கொடுத்து வளர்ப்பதும் போற்றத்தக்க நற்செயலே.

இருப்பினும், அலைபேசி (Mobile) அல்லது மடிக்கணினியில் (Laptop) வேதாகமத்தை வாசிப்பவர்களை "மூடர்கள்" என்று கண்டிப்பது விவிலியக் கட்டளை அல்ல; மாறாக, அது தனிநபரின் சுயக் கருத்தேயாகும்.

2. காலத்திற்கேற்ப மாறும் கருவிகள்; என்றும் மாறாத இறைவார்த்தை

"பத்து ஆண்டுகளுக்கு முன்பு அலைபேசியைக் கொண்டா பிரசங்கம் செய்தீர்கள்?" என்ற கேள்வி வேதாகமப் பின்னணி கொண்ட சான்றாகாது. இறைவார்த்தையை ஏந்திச் செல்லும் சாதனங்கள் காலத்தின் வளர்ச்சிக்கு ஏற்ப மாறக்கூடும்; ஆனால், அதில் அடங்கியுள்ள கடவுளுடைய வார்த்தைகள் என்றென்றும் மாறாதவை. அதாவது, வார்த்தை முக்கியம், சாதனம் அல்ல.

ஆரம்ப காலத்தில் இறைவார்த்தை கற்பலகைகளிலும், தோல் சுருள்களிலும் (Parchment), பப்பரஸ் (Papyrus) தாள்களிலும் எழுதப்பட்டது. காலப்போக்கில் அது காகிதப் புத்தகமாக மாறியது; இன்று டிஜிட்டல் வடிவத்திற்கு வந்திருக்கிறது. சாதனம் எதுவாக இருந்தாலும், அதில் வாசிக்கப்படும் தேவ செய்தி ஒன்றே.

3. வரலாற்றுச் சான்றுகளும் நடைமுறை உண்மைகளும்

பார்வையற்றோருக்கான 'பிரெய்லி' (Braille) விவிலியம், பார்வையை இழந்தவர்களுக்கான ஒலி விவிலியம் (Audio Bible), கடந்த காலத்தில் ஒலிநாடாக்கள் (Cassettes), இன்று தண்டு நினைவகம் (Pen drive) மற்றும் பல்வேறு இலக்கமுறை (Digital) வடிவங்கள் என இறைவார்த்தை பல வழிகளில் மக்களைச் சென்றடைகிறது.

கருவிகள் வேறாக இருந்தாலும், தேவ வார்த்தை ஒன்றே. இத்தகையச் சூழலில் உள்ளவர்களிடம் சென்று, "இல்லை, நீ கண்டிப்பாக அச்சிடப்பட்ட விவிலியத்தைத்தான் பயன்படுத்த வேண்டும்" என்று வற்புறுத்துவது நடைமுறைக்கும் நீதிக்கும் புறம்பானதாகும்.

4. சகோதரனை இகழ்வதும் தற்பெருமையும் – வேதம் எச்சரிக்கும் ஆபத்துகள்

மின்னணு சாதனங்கள் மூலம் விவிலியத்தைப் பயன்படுத்துபவரை "மூடன்" என்று இழிவாகப் பேசுவது ஆன்மீக ரீதியாகச் சரியான செயலல்ல.

மேலும், தன்னை மற்றவர்களை விட மிதமிஞ்சிய நீதிமானாகக் காட்டிக்கொள்வதையும் வேதம் கடுமையாக எச்சரிக்கிறது. தேவாலயத்திற்கு ஜெபிக்க வந்த பரிசேயன் "நான் மற்ற மனிதரைப் போல இல்லை" என்று தற்பெருமை பேசினான்; ஆனால், தன் தவறை உணர்ந்து தன்னைத் தாழ்த்திய ஆயக்காரனையே இயேசு ஏற்றுக்கொண்டார் (லூக்கா 18:9–14).

5. வேத வசனத்தைத் தவறாகப் பயன்படுத்துதலும் ஊழியக்காரனின் அடையாளமும்

இயேசு மத்தேயு 15:14-ல் "குருடனுக்கு வழிகாட்டும் குருடன்" என்று ஆவிக்குரிய குருட்டுத்தன்மை கொண்ட பரிசேயர்களைக் குறித்தே பேசினார். அந்தச் சூழலை விடுத்து, அலைபேசியில் வேதம் வாசிப்பவர்களைக் "குருடர்கள்" என்று சொல்வது வசனத்தின் உண்மைப் பொருளைத் திரித்துப் பயன்படுத்துவதாகும்.

 

இறைவார்த்தை என்பது பிறரைத் தாக்குவதற்கான ஆயுதம் அல்ல; மாறாக, நம்மை நாமே சோதித்துப் பார்க்கும் கண்ணாடி.

 

அலைபேசி கையில் இருப்பதை விட, இறைவார்த்தை நம் இருதயத்தில் இருப்பதே மிக முக்கியமானது.

ஓர் ஊழியக்காரர் விவிலியத்தை நேசிக்கும்படி போதிக்கலாம்; ஆனால், விவிலியத்தின் பெயரால் பிறரை இழிவுபடுத்தக் கூடாது. "நான் மட்டுமே சரி" என்ற மனநிலையை விட, தாழ்மையும் அன்பும் கொண்டிருப்பதே கிறிஸ்துவின் மெய்யான ஊழியக்காரனுக்குரிய அடையாளமாகும்.

நிறைவாக...

விவிலியத்தைச் சுமப்பது — நல்லது

விவிலியத்தை வாசிப்பது — அதைவிட நல்லது

விவிலியத்தை இருதயத்தில் பதிப்பது — மிகவும் நல்லது

விவிலியத்தின்படி வாழ்வதே — அனைத்தையும் விட முதன்மையானது

 "வசனத்தைக் கேட்கிறவர்களாய் மாத்திரம் இருந்து... அதின்படி செய்கிறவர்களாயும் இருங்கள்." — யாக்கோபு 1:22

MEYEGO+

9486 810 915