குருத்தோலை ஞாயிறு (Palm Sunday) என்பது கிறிஸ்தவ வழிபாட்டு ஆண்டில் புனித வாரத்தின் (Holy Week) தொடக்கத்தைக் குறிக்கும் முக்கிய நாளாகும்.
1.திருமறை பின்னணி (கி.பி. 30 - 33)
இயேசு கிறிஸ்து சிலுவையில் அறையப்படுவதற்கு முந்தைய ஞாயிறு அன்று எருசலேம் நகருக்குள் வெற்றி வீரராக, கழுதைக் குட்டியின் மீது ஏறி எருசலேமுக்குள் நுழைந்தார். இது பழைய ஏற்பாட்டில் சகரியா தீர்க்கதரிசி சொன்ன முன்னறிவிப்பின் நிறைவேற்றமாகக் கருதப்படுகிறது. இயேசு எருசலேமுக்குள் வந்தபோது, மக்கள் தங்கள் மேலாடைகளையும், பேரீச்ச மரக் கிளைகளையும் (குருத்தோலைகள்) வழியில் விரித்து, "ஓசன்னா! ஆண்டவர் பெயரால் வருகிறவர் போற்றப்பெறுக!" என ஆர்ப்பரித்து அவரை வரவேற்றனர்.
2. எருசலேம் சபையின் தொடக்கம் (கி.பி. 4-ம் நூற்றாண்டு)
இந்தக் கொண்டாட்டம் முதன்முதலில் எருசலேமில்தான் தொடங்கியது. கி.பி. 385-ம் ஆண்டு எருசலேமுக்கு புனிதப் பயணம் மேற்கொண்ட எஜேரியா (Egeria) என்ற பெண்மணி, அங்கு நடைபெற்ற வழிபாடுகளைப் பற்றி எழுதியுள்ளார். மக்கள் மற்றும் ஆயர்கள் ஒலிவ மலையில் கூடி, அங்கிருந்து எருசலேம் நகருக்குள் சங்கீதங்களைப் பாடிக்கொண்டு ஊர்வலமாக வந்தனர். சிறுவர்கள் ஒலிவ மரக் கிளைகளையும் பேரீச்ச மரக் கிளைகளையும் ஏந்திச் சென்றனர்.
3. மேற்கத்திய சபைகளில் பரவுதல்
சுமார் கி.பி. 450 ஆண்டுகளில் லியோன் (Lyons) போன்ற ஐரோப்பிய நகரங்களில் இந்த வழக்கம் மெதுவாகப் பரவத் தொடங்கியது. 6 -ம் நூற்றாண்டில் (Mozarabic Rite) ஸ்பெயின் மற்றும் பிரான்ஸ் போன்ற நாடுகளுக்கு இந்த வழக்கம் பரவியது. 8 ஆம் நூற்றாண்டில் "கரோலிஞ்சியன்" (Carolingian) காலத்தில், குருத்தோலைகளைப் புனிதப்படுத்தும் (Blessing of Palms) சடங்கு இணைக்கப்பட்டது. 10 ஆம் நூற்றாண்டில் இது இத்தாலியின் ரோம் நகருக்குச் சென்றடைந்தது. அங்கிருந்து உலகெங்கும் உள்ள கத்தோலிக்க மற்றும் பிற சபைகளுக்குப் பரவியது.
4. ரோமன் கத்தோலிக்க ஆசரிப்பு
கி.பி. 12-ம் நூற்றாண்டில் திருத்தந்தை (Pope) முன்னிலையில் ரோம் நகரில் பிரம்மாண்டமான ஊர்வலங்கள் நடத்தப்பட்டன. கி.பி. 1570.இல் திருத்தந்தை ஐந்தாம் பயஸ் (Pope Pius V) வெளியிட்ட 'ரோமன் மிஸ்சல்' (Roman Missal) மூலம், குருத்தோலை ஞாயிறு வழிபாட்டு முறைகள் உலகம் முழுவதும் உள்ள கத்தோலிக்க சபைகளில் முறைப்படுத்தப்பட்டன.
கி.பி. 1955.இல் திருத்தந்தை பன்னிரண்டாம் பயஸ் (Pope Pius XII) புனித வார வழிபாடுகளைச் சீரமைத்தார். இதில் குருத்தோலை ஞாயிறு ஊர்வலம் வழிபாட்டின் ஒரு கட்டாயப் பகுதியாக மாற்றப்பட்டது. கி.பி. 1969 இல்இரண்டாம் வத்திக்கான் சங்கத்திற்குப் பிறகு, இந்த நாளின் பெயர் "ஆண்டவருடைய பாடுகளின் குருத்தோலை ஞாயிறு" (Palm Sunday of the Passion of the Lord) என மாற்றப்பட்டு, கொண்டாட்டமும் தியாகமும் இணைக்கப்பட்டன.
இந்த ஞாயிற்றுக்கிழமை சபைகளில் கொடுக்கப்படும் குருத்தோலைகளை மக்கள் தங்கள் வீடுகளில் சிலுவை வடிவில் மடித்து வைப்பார்கள். அடுத்த ஆண்டு அந்த உலர்ந்த ஓலைகள் சேகரிக்கப்பட்டு, எரிக்கப்படும். அந்தச் சாம்பலே 'சாம்பல் புதன்' அன்று நெற்றியில் பூசப் பயன்படுகிறது.
5. தற்போதைய நிலை
காலந்தோறும் இந்த பவனி இன்னும் பிரம்மாண்டமாக மாறியது. மக்கள் தங்கள் வீடுகளுக்கும் வயல்களுக்கும் ஆசீர்வாதமாக இந்த குருத்தோலைகளைக் கொண்டு சென்றனர்.
சில நாடுகளில் பேரீச்ச மரம் இல்லாததால், ஒலிவ கிளைகள் அல்லது உள்ளூர் மலர் கிளைகளைப் பயன்படுத்துவார்கள். எனவே இது சில இடங்களில் 'மலர்களின் ஞாயிறு' (Flower Sunday) என்றும் அழைக்கப்படுகிறது.
இன்று கத்தோலிக்கம், லூத்தரன், ஆங்கிலிக்கன் மற்றும் பல சபைகளில் இது ஒரு மாபெரும் திருவிழாவாகக் கொண்டாடப்படுகிறது. இது வெறும் சடங்கு மட்டுமல்ல, "தாழ்மையே உண்மையான வெற்றி" என்ற இயேசுவின் செய்தியை உலகிற்குச் சொல்லும் நாளாகத் திகழ்கிறது.
Prepared by
Meyego
0 Comments