திருவிதாங்கூர் சமஸ்தானத்தில் நடைபெற்ற தோள் சீலைப் போராட்டத்தில் (மார்ச் 1813 - ஜூலை 1859) ஒடுக்கப்பட்ட பெண்களின் ஆடை உரிமைக்காக முக்கியப் பங்காற்றியவர், கிறிஸ்தவ ஊழியரான லண்டன் மிஷனரி சொசைட்டியைச் (LMS) சேர்ந்த Rev. சார்லஸ் மீட் (Rev. Charles Mead 18 - 1873) ஆவார்.
மீட்டின் நாகர்கோவில் மிஷன் சாதிய பாகுபாடுகளை உடைத்தெறிய முயன்றது; ஆனால் தஞ்சாவூர் மிஷன் இப்பாகுபாடுகளைக் கிறிஸ்தவ விசுவாசத்திற்குள்ளும் தொடரச் செய்தது. அதை மீட் தீவிரமாக எதிர்த்தார். அக்காலத்தில் திணிக்கப்பட்ட சாதிய சமத்துவமின்மைகளுள் "முலை வரி" (Breast Tax) என்பதும் ஒன்றாக இருந்தது. ஒடுக்கப்பட்ட சமூகங்களைச் சேர்ந்த பெண்கள் தங்கள் மேல்பகுதியை மூட அனுமதிக்கப்படவில்லை; அவ்வாறு மூடினால் அவர்கள் வரிக்கு உட்படுத்தப்பட்டனர்.
ஈழவர்கள் (தொழிலாளர்கள், சிறு விவசாயிகள், கள்ளுச் சொட்டுபவர்கள், மது வணிகர்கள் மற்றும் நெசவாளர்களாகப் பணியாற்றியவர்கள்), பறையர்கள் (இந்து திருவிழாக்கள் மற்றும் திருமணங்களில் மேளமிசைப்பவர்கள்; 'பரியா' [Pariah] என்ற ஆங்கிலச் சொல் 'பறையர்' என்ற தமிழ் சொல்லிலிருந்தே உருவானது) மற்றும் புலையர் சமூகங்களைச் சேர்ந்த பெண்கள் கிறிஸ்தவத்திற்கு மாறியபோது, மிஷனரிகளின் மனைவிகள் அவர்களுக்காக ஒரு ரவிக்கையையும் (பிளவுஸ்) தோள் சீலையையும் வடிவமைத்துக் கொடுத்தனர்.
1822 மே மாதத்தில், மேலாடை அணிந்த ஒடுக்கப்பட்ட சமூகக் கிறிஸ்தவப் பெண்கள் பொது இடங்களில் மோசமாக நடத்தப்பட்டனர்.
Rev. சார்லஸ் மீட் நாடார் பெண்கள் குப்பாயம் (மேல்சட்டை) மற்றும் தோள் சீலை அணிவதற்கான உரிமையைப் பெற நீதிமன்றங்களிலும் பிரிட்டிஷ் ரெசிடென்ட் கர்னல் மன்றோவிடமும் மனுக்களைச் சமர்ப்பித்துச் சட்டப்போராட்டம் நடத்தினார்.
இது தொடர்பாக மீட் கீழ் நீதிமன்றத்தில் புகார் அளித்தார். நீதிமன்றமும் மீட்டுக்கு ஆதரவாகத் தீர்ப்பளித்தது.
மற்றொரு சர்ச்சைக்குப் பிறகு, 1827-இல் இத்தீர்ப்பு ரத்து செய்யப்பட்டது. இருப்பினும், ஒடுக்கப்பட்ட சமூகக் கிறிஸ்தவப் பெண்கள் தொடர்ந்து தங்கள் மேலுடலை மூடிவந்ததால், 1855-1859 காலகட்டத்தில் இது மூன்றாவது "தோள் சீலைப் போராட்டமாக" (Upper Cloth Riot) மீண்டும் உருவெடுத்தது.
"தோள்சீலைப் போராட்டம்" (Upper cloth revolt) மற்றும் "அடிமைகள் விடுதலை" (Liberation of the slaves) ஆகிய இரு விவகாரங்களும் சில சாதிச் சூத்திரர்களுக்கு ஆத்திரத்தை மூட்டின. இதனால் அவர்கள் ஒன்றாகத் திரண்டு, நெய்யூர் மிஷனைத் தீயிட்டுக் கொளுத்தவும், மீட்டைக் கொல்லவும் சதி செய்தனர். 1829 ஜனவரி 3 ஆம் தேதி நள்ளிரவில் இத்தகவல் மீட்டிற்கு எட்டியது. உடனே அவர் சற்றும் தாமதிக்காமல், பக்கத்து மீனவக் கிராமங்களில் இருந்தும் உதயகிரிக் கோட்டையின் பிரிட்டிஷ் தளபதியிடமிருந்தும் உதவிகளைத் திரட்டினார்.
சார்லஸ் மீட் போன்ற நபர்களின் தொடர் போராட்டங்கள் மற்றும் அழுத்தங்களின் காரணமாக, 1859 ஜூலை 26 அன்று திருவிதாங்கூர் மன்னர் உத்திராடம் திருநாள் மார்த்தாண்ட வர்மா, பெண்கள் தங்கள் உடலின் மேல் பகுதியை ஆடையால் மூடிக்கொள்வதற்கு அனுமதித்து அதிகாரப்பூர்வ அரசாணையை வெளியிட்டார்.
1859 அரசாணையில் "ஒடுக்கப்பட்ட பெண்கள் உயர்வகுப்பு பெண்களைப் போல ஆடை அணியக் கூடாது" என்ற சில நிபந்தனைகள் தொடர்ந்தன. இதையும் எதிர்த்துப் போராடியதன் விளைவாக, 1865 ஜூன் 23 அன்றுதான் சாதி பாகுபாடின்றி அனைத்துப் பெண்களும் தங்களுக்கு விருப்பமான முறையில் எந்தக் கட்டுப்பாடும் இன்றி ஆடை அணியலாம் என்ற முழுமையான விடுதலை சாசன அரசாணை வெளியானது.
Complied by
Meyego
0 Comments